Ова ептен од лаичка перспектива. До сега за Linux хостингот што го нудев можеше да се плати само на годишно ниво, но бидејќи се спремам од март да нудам и Windows хостирање и планирам да може да се уплаќа за хостинг пакетите и месечно, веќе некое време размислувам како да го автоматизирам целиот процес на проверка на состојба на сметка и активирање на акаунтите. Би било навистина неефикасно ако некој треба секој ден да проверува на кого кога му истекува рокот за плаќање на месечно ниво. Бидејќи имам ебанкинг преку стопанска банка, кој и покрај некои ограничувања што ми сметаат (како известување на емаил за прилив) функционира прилично добро, логично е да размислувам во таа насока, да ги преземам изводите некако (има и xml формат) и со помош на некое мало програмче што ќе го напишам да се испарсираат сите рекорди и автоматски да се ажурира базата со инфрмации за пристигнати плаќања.

Прво разочарување беше кога сфатив дека ако се уплаќа во пошта на жиросметка во стопанска банка, изветувањето за приливот касни најмалку 24 часа, што во денешно време е многу. Не знам зашто е тоа така, но си помислив можеби ако отворам сметка во поштенска банка, и земам ебанкинг од таму ке оди побрзо. Но, бидејќи не успеав да ги добијам на телефон за да добијам одговор на ова прашање, се збоднав дури до поштенска банка во центар. Богами, за да влезеш таму има цела процедура. Обезбедување, ти даваат картичка што треба да ја покажеш на сензорот пред вратата за да влезеш, па те пречекуваат вработените уште од ходник… А јас така појдов, ни ја заверив копијата од централен регистар ни образецот заверен потпис кај нотар. Мислев, само да прашам, па после ќе се вратам… ауууу.

И добро, му ги покажав документите на службеникот, колку да видиме дали е тоа тоа, па да ги носам на нотар за заверка, и онака по пат си прашувам,

Дали известувањето за уплата во пошта на сметка на поштенска банка стига веднаш или има доцнење?

а службеникот ми вика (парафрзирано):

е-банкингот не работи, нема е-банкинг и не се знае кога ќе работи. Па така де, не ќе се лажеме!

Да. Добро што не платив за заверка на нотар. Зар да одам секој ден на шалтер да прашувам дали има прилив? нееее…

И така разочаран решив да побарам по интернет што нудат другите банки во врска со ебанкинг. Знам дека секогаш внимавав на известување по емаил, пошто ако форматот на емаилот е стандарден би можел исто да го автоматизирам процесот на обработка на известувањата за прилив. Имав видено веќе неколку веб сајта на банки и приметив дека ни комерцијална банка не нуди емаил. Ми текна на тутунска банка, проверив и пријатно се изненадив кога видов дека тие нудат и таква услуга. Но, ми се чини дека е поприлично солена. 5 денари емаил? Има и некои пакети кои не ги разбирам баш најдобро, но зарем наплаќаат по испратен емаил?

За сега не менувам ништо, останува само сметката во стопанска банка. Мислам дека ќе можам да напишам некое програмче што автоматски ќе проверува на одредено време дали има прилив, и еднаш дневно да презема извод.